Былтыр Ветеринардык кызмат ишкерлерге жалпы 2 млн 800 миң сом айып салган
Былтыр Ветеринардык кызматтын республика боюнча пландуу текшерүүнүн жүрүшүндө мыйзам бузган ишкерлер боюнча жалпысынан 630 көрсөтмө берилип, 2 миллион 800 миң сом айып салынган. Бул тууралуу Суу ресурстары, айыл чарба жана кайра иштетүү өнөр жайы министрлигине караштуу Ветеринардык кызматтын ветеринардык көзөмөл башкармалыгынын улук инспектору Азамат Кулов билдирди.
Анын айтымында, айып пул коштоочу ветеринардык документтери жок учурда жана санитардык нормаларга жооп бербеген учурда салынат.
“Биз ишкерлерди, касапканаларды, кобаса жана сүт өндүрүүчү цехтерди көзөмөлгө алып, ар бир квартал сайын пландуу текшерүү жүргүзүп келебиз. Бул жерлердин санитардык нормаларга жооп беришине биз жооптубуз”,-деди ал.
Кулов белгилегендей, ушул тапта ветеринария тармагындагы мыйзам бузууларды алдын алуу жана жоюу үчүн айып пулдардын өлчөмүн жогорулатуу аркылуу тартипти камсыздоо максатында айып пул өлчөмүн көбөйтүү каралууда.
“Суу ресурстары, айыл чарба жана кайра иштетүү өнөр жай министрлиги ветеринария жаатындагы мыйзамдарды бузгандыгы үчүн айыптын көлөмүн көбөйтүүнү сунуштап, мыйзам долбоорун Жогорку Кеңештин кароосуна киргизген. Жогорку Кеңештин агрардык саясат, сууресурстары, экология жана регионалдык өнүктүрүү боюнча комитети тарабынан аталган мыйзам долбоору каралып, жактырылды. Мыйзамга ылайык,жеке жактарга 5 миң 500 сом, ал эми юридикалык жактарга 23 миң сом. Долбоор үчүнчү окууда жактырылса, мыйзам күчүнө кирет, ”,-деди ал.
