Адылбек Касымалиев менен Алексей Оверчук эки тараптуу кызматташтыктын актуалдуу маселелерин талкуулады

Министрлер кабинетинин төрагасы Адылбек Касымалиев Кыргызстанга иш сапары менен келген Россия өкмөтүнүн төрагасынын орун басары Алексей Оверчук менен жолугушуу өткөрдү.

Жолугушуу эки өлкөнүн негизги министрликтеринин жана ведомстволорунун жетекчилеринин катышуусунда кеңейтилген курамда өткөрүлдү.

Конструктивдүү жана мазмундуу сүйлөшүүнүн жүрүшүндө тараптар эки тараптуу кызматташуунун негизги багыттарына кирген экономикалык, социалдык, инвестициялык, өнөр жай жана маданий-гуманитардык тармактарды талкуулашты. Кыргызстан менен Россиянын экономикалык өнүгүүсү үчүн стратегиялык мааниге ээ болгон биргелешкен долбоорлорду ишке ашыруунун келечегине, ошондой эле эки мамлекеттин лидерлери тарабынан коюлган милдеттерди ишке ашырууга өзгөчө көңүл бурулду.

Адылбек Касымалиев Кыргызстан менен Россияны байланыштырган союздаштык мамилелердин жана стратегиялык өнөктөштүктүн бузулбастыгын белгиледи. Ал эки тараптуу кызматташунун күн тартибиндеги актуалдуу маселелерди ыкчам жана натыйжалуу чечүүгө мүмкүндүк берген жолугушуулардын салтка айланган ишенимдүү жана достук атмосферасын белгиледи.

Соода-экономикалык мамилелерди өнүктүрүүдөгү оң динамикага да көңүл бурулду. 2024-жылы Кыргызстан менен Россиянын ортосундагы өз ара сооданын көлөмү 3,5 млрд долларга жетип, өткөн жылга салыштырмалуу 14,5% өсүштү көрсөттү. Тараптар сооданын көлөмүн мындан ары да көбөйтүүгө өз ара кызыкдар экендиктерин ырасташты.

Минкаб төрагасы үстүбүздөгү жылдагы эки тараптуу иш-чаралардын тыгыз графигин белгилеп, Россия өкмөтүнүн төрагасы Михаил Мишустиндин Кыргызстанга боло турган расмий сапарынын, ошондой эле Кыргызстандын аймагында Кыргыз-Россия Өкмөттөр аралык комиссиясынын 26-жыйынынын өткөрүлүшүнүн маанилүүлүгүн белгиледи.

“Союздаштык мамилелердин алкагында кызматташуу жана биздин президенттер койгон бардык милдеттер биз тараптан ийгиликтүү ишке ашырылып жатат”, – деген Адылбек Касымалиев Кыргызстан Россия менен ар тараптуу кызматташууну тереңдетүүгө умтуларын ырастады.

Россия өкмөтүнүн төрагасынын орун басары Алексей Оверчук кыргыз-орус байланыштары мындан ары да чыңдаларына ишенимин билдирип, биргелешкен долбоорлорду ишке ашырууда орус тарап Кыргызстанга ар тараптуу колдоо көрсөтүүгө даяр экенин ырастады.

Жыйындын соңунда Россия Федерациясынын өкмөтүнүн төрагасынын орун басары Алексей Оверчукка Кыргыз Республикасынын жогорку мамлекеттик сыйлыгы – “Достук” орденин тапшыруу салтанаттуу аземи болду.

“Кыргыз Республикасынын президентинин чечими менен Кыргыз Республикасынын мамлекеттик жогорку сыйлыгы – Сиздин “Достук” ордени менен сыйланганыңызды маалымдоо мен үчүн чоң сыймык”, – деди Адылбек Касымалиев.

Ал Алексей Оверчукту татыктуу сыйлыгы менен куттуктап, анын кыргыз-орус ар тараптуу кызматташтыгын чыңдоого кошкон жеке салымын белгилеп, соода жүгүртүүнүн динамикалуу өсүшүн жана Россиядан түз чет элдик инвестициялардын агылып келүүсүн белгиледи.

“Сиз Өкмөттөр аралык комиссиянын теңтөрагасы гана эмес, Кыргызстандын ынак досусуз”, – деп белгилеген Адылбек Касымалиев Алексей Оверчуктун эки өлкөнүн ортосундагы достукту жана өз ара түшүнүшүүнү өнүктүрүүгө кошкон баа жеткис жеке салымы үчүн ыраазычылык билдирди.

Өз кезегинде Алексей Оверчук мындай сый үчүн чын жүрөктөн ыраазычылык билдирди.

“Сиздерге чоң ыраазычылык билдирем, бул жогорку сыйлык мени абдан кубандырды. Бул орден биздин жалпы ийгиликтерибиздин таанылышы”, – деп белгилеген Алексей Оверчук, Кыргыз Республикасы ар дайым Россия Федерациясынын ишенимдүү досу жана союздашы болуп келгендигин кошумчалады жана эки тараптуу байланыштар мындан ары да өнүгүп, чыңдаларына ишеним билдирди.