Одоно эреже бузуулар үчүн Бишкек шаардык транспортунда 30 айдоочу иштен алынат
Бишкек шаарынын мэри муниципалдык автобустун айдоочулары менен жолугушту.
Муниципалитеттен билдиргендей, буга чейин Бишкек шаарынын мэри Айбек Джунушалиевдин катышуусунда “Бишкек шаардык транспорт” муниципалдык ишканасында жыйын өткөн.
Борбор калаанын башчысы муниципалдык коомдук транспорттун айдоочуларына жаңы автобустардын катышуусундагы жол кырсыктары жана жол эрежесин бузуулар көбөйүп жаткандыгы тууралуу эскертүү жасады.
«Кыргыз Республикасынын Президенти Садыр Жапаровдун колдоосу менен Бишкек шаарына 1000 жаңы автобус сатылып алынды. Бирөөнү сүзүп, кетсеңер, автобустун ичиндеги жүргүнчүнү майып кылып алсаңар, эмне болот? Биздин азыркы саясат баарына бирдей – мыйзамды, эрежелерди сактоо», – деп кошумчалады А.Джунушалиев.
Мэр муниципалдык автобустардын айдоочуларына негизги талаптарды – жол эрежесин так сактоону белгиледи.
Жол эрежесин одоно бузгандыгы үчүн, башкача айтканда, каршы тилкеге чыгуу, тыюу салынган светофордон өтүү, автобустун ичинде жүргүнчүлөрдүн кулап кетиши жана башка одоно эреже бузуулар үчүн Бишкек шаардык транспортунда 30 айдоочу иштен алынат.
Ошондой эле ишкананын базасында айдоочулар системалуу түрдө билим алып, өз жөндөмдөрүн өркүндөтүшү үчүн 5 симулятор орнотулган.
Бишкек шаарынын мэриясынын Транспорт жана жол-транспорттук инфратүзүмүн өнүктүрүү департаментине айдоочулардын жол кыймылынын эрежелерин сактоосун күчөтүү милдети тапшырылды.
