Төрага Нурланбек Шакиев баштаган парламенттик делегация Ташкент шаарындагы Технопарктын ишмердүүлүгү менен таанышты

Бүгүн, 27-сентябрда Кыргыз Республикасынын Жогорку Кеңешинин Төрагасы Нурланбек Шакиев Өзбекстан Республикасындагы расмий иш сапарынын алкагында Ташкент шаарындагы Технопарктын ишмердүүлүгү менен таанышты.

Алсак, 104 гектар аймакты ээлеген аталган Технопарк 2019-жылы негизделип, азыркы тапта беш миңден ашуун адам эмгектенет. Өндүрүштүк жайдан үй тиричилик буюмдары жана курулуш материалдары чыгарылып, алар өлкө ичинде жана чет мамлекеттерге сатылат. Тагыраагы, өткөн жылы 400 млн АКШ долларына барабар товар өндүрүлүп, анын 100 млн АКШ долларына барабар бөлүгү чет өлкөгө экспорттолгон.

Мындан тышкары, Төрага IT парктын да ишмердүүлүгү менен таанышып, андагы мүмкүнчүлүктөрдү көрүп чыкты. Белгилүү болгондой, Өзбекстандагы санариптештирүү жаатындагы долбоорлордун бардыгы аталган IT парктын көмөгү менен ишке ашырылат. Андан тышканы былтыр IT тармагына тиешелүү 300 млн долларлык товар чет өлкөгө чыгарылып, 2030-жылы анын көлөмүн 5 млрд долларга жеткирүү максатталган.

Ишке ашырылып жаткан долбоорлорго жогору баасын берген Төрага Нурланбек Шакиев ааламдашкан доордо IT тармагы өтө маанилүү экенин белгилеп: “Бардык өлкөнүн башкаруу саясаты сөзсүз түрдө санариптештирилип, толугу менен заманбап багытта өнүгүшү кажет. Бул жаатта Кыргызстан менен Өзбекстан да жигердүү кызматташып, санариптештирүү жаатында тажрыйба алмашуусу зарыл”, – деп кошумчалады.