Республика боюнча 12,8 миңден ашык аз камсыз болгон үй-бүлө мамлекет менен социалдык келишимге кол коюшту

Эмгек, социалдык камсыздоо жана миграция министрлигинен билдиришкендей, эки жылдын ичинде республика боюнча 12,8 миңден ашык аз камсыз болгон үй-бүлө мамлекет менен социалдык келишимге кол коюшкан.

Аталган долбоор КР Президенти С.Н.Жапаровдун демилгеси менен аз камсыз болгондордун деңгээлин жогорулатуу, чакан ишкерликти өнүктүрүү максатында ишке ашырылууда.

Мамлекет менен социалдык көзөмөл түзгөн үй-бүлөлөр алган 100 миң сомго чакан нан бышыруучу жайларды, тигүү жана эмерек жасоочу устаканаларды, күнөсканаларды, курулуш материалдарын өндүрүүнү, мал чарбачылыгын, ошондой эле ар кандай тармактарда калкты тейлөөгө багытталган чакан ишканаларды ачышты.

Эмгек, социалдык камсыздоо жана миграция министрлиги өткөн жылдагы социалдык келишимди ишке ашыруунун жыйынтыгын чыгарды.

Министрликтин маалыматы боюнча, катышуучулардын 96% киреше алышат, калгандарынын кирешелерине сезондуулук жана форс-мажордук жагдайлар таасир этет.

Катышуучулардын кирешеси жумасына 500дөн 10 миң сомго чейин.