Төрага Нурланбек Шакиев Беларустун Президенти Александр Лукашенко менен жолугушту
- Жогорку Кеңеш
admin
- 0
- 1 мүнөт окуу
Бүгүн, 18-майда Кыргыз Республикасынын Жогорку Кеңешинин Төрагасы Нурланбек Шакиев Беларусь Республикасынын Президенти Александр Лукашенко менен жолугушту. Бул тууралуу КРнын Жогорку Кеңешинин коомчулук жана ЖМК менен иштөө бөлүмү маалымдады.
Көз карандысыздык сарайында өткөн жолугушууга Жамааттык коопсуздук келишим уюмунун Парламенттик ассамблеясына мүчө мамлекеттердин парламенттеринин төрагалары да катышты.
Жолугушууда Жамааттык коопсуздук келишим уюмунун учурдагы абалы жана анын келечеги талкууланып, кызматташтыкты өнүктүрүүдө парламенттердин ролу жогору экени белгиленди.
Ошондой эле Беларусь Республикасынын Президенти Александр Лукашенко Парламенттик ассамблеянын ишин жакшыртуу жаатындагы сунуш-пикирлери менен бөлүштү. Анын ичинен коргоо жана коопсуздук жаатындагы моделдик мыйзамдарды иштеп чыгуу маселелерине токтолду.
Муну менен катар уюмга мүчө мамлекеттерде өткөн шайлоо өнөктүктөрүнө байкоочу катары Парламенттик ассамблеянын миссиясынын катышуусу өзгөчө мааниге ээ экенин айткан Александр Лукашенко социалдык-экономикалык, маданий-гуманитардык алакаларды арттыруу зарылчылыгын да кошумчалады.
