Акыркы коңгуроодо мектептен тышкаркы кечелерди өткөрүүгө тыюу салынат

29-майда өлкөнүн бардык мектептеринде акыркы коңгуроо иш-чарасы өтөт. Буга байланыштуу Ички иштер министрлиги жана Агартуу министрлиги бүтүрүүчүлөрдү коопсуздук эрежелерин кылдат сактоого чакырат.

ИИМден белгилешкендей, бүтүрүү иш-чараларына байланыштуу төмөнкү аракеттерге жол берилбейт:

• Мектептен тышкары кошумча кечелерди уюштурууга;
• Фейерверктерди жана башка кооптуу пиротехникалык каражаттарды колдонууга;
• Жашы жете элек өспүрүмдөрдүн автоунаа башкаруусуна.

“Коомдук тартипти жана жол кыймылынын коопсуздугун камсыз кылуу максатында милиция күчөтүлгөн тартипте кызмат өтөйт. Бул күндөрү өзгөчө төмөнкү аймактар көзөмөлгө алынат:

• Коомдук эс алуу жайлары жана парктар;
• Кафе-ресторандар жана оюн-зоок борборлору;
• Суу сактагычтар жана көл жээктери;
• Эл аралык жана ички унаа жолдору.

Мектеп жетекчилерин, ата-энелерди жана бүтүрүүчүлөрдү мыйзам талаптарын сактоого, ошондой эле балдардын коопсуздугуна өзгөчө көңүл бурууга чакырабыз”, — деп айтылат маалыматта.