ШКУга мүчө мамлекеттердин өкмөт башчылары Россиянын Президенти Владимир Путин менен жолугушту

Министрлер Кабинетинин Төрагасы Адылбек Касымалиев Шанхай кызматташтык уюмуна (ШКУ) мүчө мамлекеттердин өкмөт башчылары жана делегациялары менен бирге Россия Федерациясынын Президенти Владимир Путин менен жолугушту.

Жолугушуу Россиянын Президенти Владимир Путиндин саламдашуусу менен башталды.

«Баарыбыздын бир жалпы максатыбыз бар – Евразия континентиндеги жана жалпы эле дүйнөдөгү эң ири аймактык бирикмелердин бири катары ШКУнун кадыр-баркын жана таасирин жогорулатуу. Өкмөттөргө, албетте, конкреттүү практикалык ишти жолго салууда, уюмга мүчө мамлекеттердин көп пландуу өз ара аракеттенүүсүн кеңейтүү боюнча иште өзгөчө роль таандык. Практикалык иштерге келгенде өкмөттөрдүн ролу ар дайым өзгөчө», – деп белгиледи Владимир Путин.

Андан соң Россия Федерациясынын Өкмөтүнүн Төрагасы Михаил Мишустин, ошондой эле Шанхай кызматташтык уюмунун Башкы катчысы Нурлан Ермекбаев жана ШКУнун Өкмөт башчылар кеңешинде төрагалык кылуучу Тажикстан Республикасынын Премьер-министри Кохир Расулзода сөз сүйлөштү. Жолугушуунун жүрүшүндө тараптар аймактык күн тартибиндеги актуалдуу маселелер боюнча пикир алмашышты.