Кыргызстанда керектөө бааларынын өсүшү 7,1 пайызды түздү
Үстүбүздөгү жылдын январь-октябрында (мурунку жылдын декабрына салыштырмалуу) керектөө бааларынын жана тарифтердин жалпы республика боюнча өсүшү 7,1 пайызды түздү.
Улуттук статистика комитетинен билдиришкендей, мында баалар тамак-аш азыктарына жана алкоголсуз суусундуктарга – 7,4 пайызга, алкоголдук ичимдиктерге жана тамекиге – 6,7 пайызга, азык-түлүк эмес азыктарга – 5,6 пайызга жана калкка кызмат көрсөтүүлөрдүн тарифтери – 8,9 пайызга жогорулаган.
Ушул жылдын январь-октябрында (мурунку жылдын декабрь айына салыштырмалуу) республиканын бардык аймактарында керектөө бааларынын жана тарифтердин жогорулашы байкалды.
Баалардын максималдуу өсүшү – 9 пайыз Ош шаарында катталды, бул алкоголдук ичимдиктерге жана тамекиге (12,1 пайыз) жогорулашы менен шартталды.
Азык-түлүк жана алкоголсуз суусундуктарга болгон баанын эң жогорку өсүшү (10,5 пайызга) Чүй облусунда, азык-түлүк эмес товарларга (8,1 пайызга) Баткен облусунда жана калкка көрсөтүлүүчү кызматтардын тарифтерине (10,4 пайызга) Бишкек шаарында белгиленди.
