Кербен шаарындагы саркынды сууларды тазалоочу курулма сентябрь айында бүтөт

Жогорку Кеңештин Төрагасы Нурланбек Тургунбек уулу Кербен шаарынын саркынды суу тутумун жана саркынды сууларды тазалоочу курулмасын куруу боюнча жүргүзүлүп жаткан иштерди көрдү.

Алсак, 46 миңдей калкы бар Кербен шаарында саркынды сууларды тазалоочу курулмалар эскирип, жараксыз абалга келген. Ага ылайык, өткөн жылы атайын долбоор иштелип чыгып, курулуш иштери башталган. Жалпы 60 млн сомго заманбап жабдуулар менен жасалган тутум кийинки айда ишке берилери күтүлүүдө. Курулма толук ишке киргизилсе, саатына 400 куб саркынды сууну тазалап чыгууга өбөлгө түзүлөт.

Төрага Нурланбек Тургунбек уулу бул инфаструктуралык долбоорлордун Кербен шаары үчүн мааниси чоң экенин белгилеп, биринчи кезекте тутумга социалдык мекемелерди туташтырып, жеке үйлөрдү да тездетип кошуу керектигин билдирди.

Ошондой эле, “Саркынды сууларды тазалоочу курулма шаар тургундарынын саламаттыгы үчүн эле эмес, калаанын мындан ары өнүгүшү үчүн зарыл”, – деген Төрага жүргүзүлүп жаткан иштин сапатына өзгөчө көңүл бурууга чакырды.

Мындан тышкары, тарыхта биринчи жолу Кербен шаарына мамлекет тарабынан эбегейсиз көлөмдөгү каражаттар бөлүнүп, социалдык-инфраструктуралык долбоорлор ишке ашырылып жатканын эске салган Нурланбек Тургунбек уулу: “Өлкө казынасынан каралган каражаттын бир дагы тыйынын текке кетирбей, элибиздин жашоо-шартын жакшыртууга жумшашыбыз керек. Жергиликтүү жетекчилер акчаны сарамжалдуу пайдаланып, тыкыр көзөмөлдөшү зарыл”, – деди.