Экономика министрлиги: Табигый суусундуктарга болгон акциздик салык төмөндөтүлдү
Кайра иштетүүчүлөрдү колдоо максатында табигый суусундуктарга болгон акциздик салык төмөндөтүлдү. Бул тууралуу Экономика жана коммерция министрлигинен билдиришти.
Маалыматка ылайык, министрлер кабинети “КР Салык кодексинин 336 жана 345-беренелерин ишке ашыруу чаралары жөнүндө” токтомуна өзгөртүүлөрдү киргизүүгө багытталган токтом кабыл алды. Бул токтом кыргызстандык айыл чарба өндүрүүчүлөрдөн сатып алынган жемиштерден, кургатылган жемиштерден жана мөмөлөрдөн шекер кошуу менен даярдалган компот, шербет, нектар жана морс өндүргөн жергиликтүү өндүрүүчүлөр үчүн салыктык жүктү азайтууга багытталган.
Токтом 2025-жылдын 15-майынан тартып акциздик салыктын жеңилдетилген ченин – 1 сом/литр өлчөмүндө белгилөөнү карайт. Мындай чара продукциянын өздүк наркын төмөндөтүүгө, анын ички жана тышкы рыноктордо атаандаштыкка жөндөмдүүлүгүн жогорулатууга мүмкүндүк берип, КР президентинин айыл чарба продукцияларын кайра иштетүү жана экспорттоо көлөмүн көбөйтүү боюнча жарлыгын аткарууга өбөлгө түзөт.
Документ Мамлекеттик салык кызматы жана Суу ресурстары, айыл чарба жана кайра иштетүү өнөр жайы министрлиги менен биргеликте иштелип чыккан.
Токтом коомдук талкуу жүргүзүүнүн алкагында Жогорку Кеңештин депутаттарынын жана агрардык бизнес өкүлдөрүнүн пикирлерин эске алуу менен такталып, толуктоолор киргизилген.
Акциздик салыктын төмөндөтүлүшү — бул табигый суусундуктарды өндүргөн ички өндүрүштү туруктуу өнүктүрүү багытындагы маанилүү кадам болуп саналат. Анын аркасында табигый компоттор, нектарлар жана морстар калк үчүн жеткиликтүүрөөк болуп, ошол эле учурда жергиликтүү фермерлердин продукциясына болгон суроо-талап өсөт.
