Садыр Жапаров Баткен облусунун башчысына оозеки эскертүү берди
Садыр Жапаров президенттин Баткен облусундагы ыйгарым укуктуу өкүлү Айбек Шаменовго оозеки эскертүү берди. Бул тууралуу президенттин басма сөз катчысы Аскат Алагөзов билдирди.
Маалыматка ылайык, Айбек Шаменовго Достук айылынын жашоочулары менен жол берилгис тон менен баарлашкандыгы үчүн оозеки түрдө эскертүү берилди.
Мамлекет башчысы кызмат адамдары этикалык нормаларды сактоо жана калкка урмат-сый менен мамиле кылуу үчүн өзгөчө жоопкерчиликтүү экенин баса белгиледи. Айрыкча ыйык Орозо айында мындай жүрүм-турумга жол берилбейт.
“Президент мамлекеттик бийликтин бардык өкүлдөрүн жарандар менен иштөөдө урмат-сый жана сылыктык принциптерин бекем сактоого чакырды”,-деп айтылат маалыматта.
Белгилей кетсек, буга чейин облус башчысы Баткендин Достук айылынын тургундары менен жолугушуу өткөргөн видеосу тараган.
