Кыргызстан менен Татарстандын Эмгек министрлиги кызматташууну талкуулады
Эмгек, социалдык камсыздоо жана миграция министри Кудайберген Базарбаев Казань шаарында Татарстан Республикасынын Эмгек, ишке орноштуруу жана социалдык камсыздоо министрлигинин жетекчилиги менен жолугушту. Бул тууралуу КРнын Эмгек, социалдык камсыздоо жана миграция министрлигинин басма сөз кызматы маалымдады.
Жолугушууда ведомстволор аралык өз ара аракеттенүү, эмгекти коргоо, коопсуздук, эмгек мамилелери жана иш менен камсыз кылуу маселелери боюнча министрликтердин ортосундагы кызматташуу маселелери талкууланды.
Жыйында курулуш жана нефтехимия тармагында жумушка орношуу мүмкүнчүлүгү каралды.
«Кыргыз Республикасынын Президенти С.Н.Жапаровдун биринчи жарлыктарынын бири коопсуз эмгек миграциясы үчүн шарттарды түзүү жөнүндө жарлыгы болду. Бул жарлыкты ишке ашыруунун алкагында Эмгек министрлиги келген өлкөлөрдө биздин жарандарга, биринчи кезекте мыйзамдуу ишке орноштуруу жана эмгек укуктарын коргоо маселелери боюнча ар тараптуу колдоо көрсөтүүдө.
Биз эмгек мигранттарын эмгек акысын өз убагында төлөп, социалдык пакеттин болушу менен ишке орноштурууга кызыкдарбыз», — деп түшүндүрдү Кудайберген Базарбаев.
Өз кезегинде министр Татарстандагы кесиптештерине кабыл алгандыгы үчүн ыраазычылык билдирип, аларды ушул жылдын июль айында Кыргыз Республикасында өтө турган эмгекти жөнгө салуу боюнча эл аралык конференцияга чакырды.
