КТЖ эскирген ысытуу лампаларын заманбап светодиоддук лампаларга алмаштыруунун эсебинен 2 млн сом үнөмдөдү

Темир жол объекттериндеги эскирген ысытуу лампаларын заманбап светодиоддук лампаларга алмаштыруу электр энергиясын жылына 2 миллион сомго жакын үнөмдөөгө алып келди. Бул тууралуу «Кыргыз темир жолу» УК» МИнин басма сөз кызматы маалымдады.

«Кыргыз темир жолу» УК» МИнин негизги иши күнү-түнү жүргүнчүлөрдү, жүктөрдү, багажды, жүк-багажды ташуу болуп саналат. Жол кыймылынын жана ташылган жүктөрдүн коопсуздугун сапаттуу камсыздоо, адамдардын өмүрүнө коркунуч келтирбөө жана электр энергиясын үнөмдөө максатында ысытуу лампалары жаңы светодиоддук жарыктандырууга алмаштырылды.

2021-жылдан 2023-жылга чейин темир жол аркылуу автомобиль транспорту өтүүчү күзөт өтмөктөрүнө жана жүргүнчүлөрдү отургузууга жана түшүрүүгө ыңгайлуу болушу үчүн станциялардын аймактарын жарыктандыруучу мачталарга 400дөн ашык светодиоддук лампалар орнотулган.

Натыйжада электр энергиясын үнөмдөө бир айда 165 849 сомду, ал эми бир жылда 1 990 188 сомду түзөт.

Станциянын аймагынын бүткүл периметрин жарыктандыруу үчүн станциянын мойнуна орнотулган мачталардагы жарыктын сапаты төмөнкүдөй параметрлер боюнча жакшыртылды: жарык агымы үч эсе жогору, кызмат мөөнөтү 11 эсе, ал эми электр энергиясын үнөмдөө 8 эсе жогору. Перронду жарыктандырууда: жарыктын агымы 2 эсе жакшырды, иштөө мөөнөтү 17 эсе узарып, электр энергиясын үнөмдөө 5 эсеге көбөйдү.

Бул жакшыртуулар темир жол объекттериндеги коопсуздукту гана камсыз кылбастан, энергетикалык ресурстарды дагы натыйжалуу пайдаланууга өбөлгө түзөт.