Айыл чарба министрлигинде дээрлик жарым млрд сомдук финансылык бузуулар аныкталды

Айыл чарба министрлигинде, анын түзүмдүк жана аймактык бөлүмдөрүнө финансылык бузуулар аныкталды. Бул тууралуу Эсептөө палатасынан билдиришти.

16-февралда Эсептөө палатасынын Кеңешинин кезектеги жыйынында, 2021-2022-жылдар аралыгына карата жүргүзүлгөн шайкештик аудиттин жыйынтыктары тууралуу отчет каралды.

Аудиттин жыйынтыгы боюнча, жалпы 472 млн 357,2 миң сомдук финансылык тартип бузуулар жана кемчилдиктер аныкталды:

• каражаттарды чыгымдоодогу бузуулар жана кем чыгуулар – 60 млн 147,1 миң сом;
• бюджеттин кошумча кошуп эсептелген кирешелери – 943,8 миң сом;
• Соцфонддун кошумча кошуп эсептелген кирешелери – 760 миң сом;
• бюджеттин чыгымдар бөлүгү жана башка төлөмдөр боюнча бюджеттин жоготуулары – 76 млн 19,5 миң сом;
• рационалдуу эмес пайдаланылган каражаттар – 289 млн 485,6 миң сом;
• эсепке алуу жана отчеттуулук тартибин бузуу – 45001,2 миң сом.

Өзгөчө кырдаалдар министрлигине караштуу Мамлекеттик материалдык резервдер фондунда сатылып алынган айыл чарба өсүмдүктөрүнүн үрөнүнүн жана жер семирткичтердин 2022-2023-жылдары керектөөчүлөргө сатылышына жана таратылышына утурлама аудиттин жыйынтыгында аныкталган 214 млн 397,9 миң сом жоготуулар боюнча маалыматтар Ички иштер министрлигине укуктук баа берүү үчүн жөнөтүлөт.