Президент иш сапар менен Азербайжанга барат
Кыргыз Республикасынын Президенти Садыр Жапаров бүгүн, 24-ноябрда, БУУнун Борбор Азия экономикалары үчүн Атайын программасынын (СПЕКА) мамлекет башчыларынын Саммитине катышуу үчүн иш сапары менен Баку шаарына жөнөп кетти.
Президенттин Администрациясынын тышкы саясат бөлүмүнүн башчысы Муратбек Азымбакиевдин айтымында, Саммит Азербайжан Республикасынын Президенти Ильхам Алиевдин төрагалыгы алдында өтөт. Быйыл СПЕКА Программасынын 25 жылдыгы белгиленет.
“Борбор Азия өлкөлөрүнүн лидерлери экономикалык кызматташтыктын актуалдуу маселелерин талкуулап, алдыдагы милдеттерди аныкташат, ошондой эле региондогу өлкөлөрдүн экономикаларын чыңдоого багытталган бир катар документтерди кабыл алышат.
Иш сапарынын алкагында Президент Садыр Жапаров СПЕКА Саммитинде сөз сүйлөп, Азербайжан Республикасынын Президенти Ильхам Алиев менен жолугушат”, — деп белгиледи Муратбек Азымбакиев.
