Кафе-ресторандардан түшкөн салык кескин көбөйдү
Коомдук тамактануу тармагына фискалдык программалык камсыздоону киргизүү салыктык түшүүлөрдү 60%га көбөйттү. Бул тууралуу Мамлекеттик салык кызматынан билдиришти.
Маалыматка караганда, 2026-жылдын январь-май айларында пилоттук долбоорду ишке ашыруудан салыктык түшүүлөрдүн көлөмү 1 млрд 536,7 млн сомду түздү.
“Бул көрсөткүч пилоттук долбоор ишке киргизилгенге чейинки, башкача айтканда 2025-жылдын ушул мезгилиндеги көрсөткүчтөн 615,5 млн сомго же 60 пайызга көп. Оң динамика орточо айлык салыктык түшүүлөрдүн өсүшү менен да ырасталууда”, – деп айтылат маалыматта.
Фискалдык программалык камсыздоого кошулганга чейин орточо айлык түшүүлөрдүн көлөмү 184,2 млн сом болсо, эсепке алуу системасы киргизилгенден кийин бул көрсөткүч 307,3 млн сомго жетти. Өсүү темпи 166,8 пайызды түздү.
Салыктык түшүүлөрдүн өсүшү ишкерлердин ишмердүүлүгүнүн ачыктыгынын жогорулашынын, акчалай эсептешүүлөрдүн толук эсепке алынышынын жана көмүскө жүгүртүүнүн кыскарышынын натыйжасында камсыздалды.
Белгиленгендей, мындай жыйынтыктар ФПКны киргизүү мамлекеттик бюджеттин киреше бөлүгүн көбөйтүүгө, бизнес жүргүзүүдө бирдей шарттарды түзүүгө жана салыктык тартиптин деңгээлин жогорулатууга өбөлгө түзөт.
