Өлкөгө мөөнөтү өтүп кеткен товарларды ташып кирүү каналы аныкталды

Жарамдуулук мөөнөтү өтүп кеткен продукцияны системалуу түрдө ташып келүү, жасалмалоо жана сатуу боюнча кылмыш схемасы токтотулду. Бул тууралуу УКМКдан билдиришти.

Атайын кызмат мамлекеттин экономикалык жана санитардык коопсуздугун камсыз кылуу боюнча иш-чаралардын алкагында ата мекендик жаңы азык-түлүккө жамынып, мөөнөтү өтүп кеткен тамак-аш азыктарын системалуу түрдө ташып келүү, жасалмалоо жана сатуунун кылмыштуу схемасын аныктап, бөгөт койду.

Козголгон кылмыш ишинин алкагында “Евразия канаттуулар фабрикасы” ЖЧКсынын Канаттуулар фабрикасынын объекттеринде жана аталган уюмдун жетекчисинин жашаган жеринде тинтүү иш-чаралары жүргүзүлгөн.

Тинтүүнүн жүрүшүндө канаттуулар фабрикасынын муздаткыч жайларында жарактуулук мөөнөтү өткөн өзгөчө ири өлчөмдөгү контрафакттык канаттуулар продуктылары табылган (маалымдама: көрсөтүлгөн азыктар кийин шаардын базарларында жана гипермаркеттер тармагында ата мекендик бренд менен кайра таңгакталат жана сатылат), көрсөтүлгөн фактылар системалуу мүнөзгө ээ жана мамлекеттин санитардык-эпидемиологиялык жана экономикалык коопсуздугуна коркунуч жаратат.

Мындан тышкары канаттуулар фабрикасынын жетекчилиги тарабынан миграциялык мыйзамдарды бузуу фактылары аныкталган, алар Бангладештин 28 жаранын жана Пакистандын 4 жаранын Кыргызстандын аймагында эмгектенүүгө уруксаты жок мыйзамсыз ишке тарткан.

Учурда УКМК тарабынан мыйзамсыз иш-аракеттердин башка катышуучуларын аныктоо боюнча тергөө иш-чараларынын комплекси жүргүзүлүүдө.