Өлкөгө электромобилдерди бажы төлөмүсүз ташып кирүүнүн чеги жакындады
Кыргызстандын Мамлекеттик бажы кызматы электромобилдерди өлкөгө бажы төлөмүсүз ташып кирүү үчүн белгиленген чеги жакындап калганын кабарлайт.
Ведомстводон белгилешкендей, Евразия экономикалык комиссиянын Кеңешинин 2009-жылдын 27-ноябрындагы №130 чечиминин 7.1.38-пунктуна ылайык, электр кыймылдаткычтары бар моторлуу транспорт каражаттары (8703 80 000 2 ТН ВЭД ЕАЭБ коду менен классификацияланган) төмөнкү чектөөлөр менен бажы төлөмүсүз киргизилет:
- 2022-жылы — 5 миң автоунаа;
- 2023-жылы — 10 миң автоунаа;
- 2024-жылы — 10 миң автоунаа;
- 2025-жылы — 10 миң автоунаа.
2025-жылдын 4-сентябрына карата Кыргызстанга 8 558 электромобил киргизилген. Белгиленген лимитке жеткенден кийин электромобилдерди киргизүү үчүн бажы төлөмү алардын бажы баасынын 15 пайыз көлөмүндө төлөнө баштайт.
