Президент Эл аралык Астана форумунда Борбор Азия өлкөлөрүнүн кооперациясынын артыкчылыктары тууралуу айтып берди
Кыргыз Республикасынын Президенти Садыр Жапаров бүгүн, 8-июнда, Эл аралык Астана форумунун алкагында модератор Ричард Квесттин бүткүл региондун экономикалык жана экологиялык дивиденддерин алуу үчүн Борбор Азия өлкөлөрүнүн кооперациясынын артыкчылыктары жөнүндө суроосуна жооп берүү менен аймактык интеграциянын маанилүүлүгүн белгиледи.
Мамлекет башчысы региондун мүмкүнчүлүктөрү жана чакырыктары ар түрдүү экендигин баса белгиледи. Жаратылыш ресурстарынын чоң запастары, олуттуу демографиялык потенциал, Евразиянын борборундагы транзиттик мүмкүнчүлүктөр биргелешкен өз ара пайдалуу кызматташтык жана өнүгүү үчүн бардык шарттарды түзөт.
“Биздин аймак чоң транспорттук-логистикалык потенциалы бар чоң геоэкономикалык мейкиндик. Бул жерде бизде экономикалык кызматташуунун жана өз ара аракеттенүүнүн бардык формалары, анын ичинде Евразия экономикалык биримдиги, Көз карандысыз Мамлекеттер Шериктештиги, Шанхай Кызматташтык Уюму сыяктуу аймактык аянтчаларда ийгиликтүү калыптанууда. Мындан тышкары, бул системанын бардык компоненттери бири-бирин толуктап жана кубаттап турат. Биздин аймак стратегиялык жактан ар кандай цивилизациялык жана геосаясий системалардын кесилишинде жайгашкан, Азия, Европа жана Жакынкы Чыгыштын ортосундагы “көпүрө” болуп саналат. Бул контекстте С5 +форматында ийгиликтүү иштеп жаткан аймактык аянтчаларды белгилегим келет – Россия, Кытай, Япония, Корея, АКШ, Европа Бирлиги жана Индия. Биз, Борбор Азиянын тектеш элдеринин өкүлдөрү, жалпы өткөн тарыхыбыз, миңдеген жылдык тарыхыбыз жана маданиятыбыз менен сыймыктанабыз; биздин каада-салт жана үрп-адаттарыбызда көптөгөн окшоштуктар бар; менталитет, психология, мамиле жана дүйнө тааным окшоштуктары жагынан да бизди көп нерсе жакындатып турат. Мунун баарын мен биздин жалпы байлыгыбыз, өтө маанилүү “атаандаштык артыкчылыгыбыз” деп атамакмын”, – деп белгиледи Президент Садыр Жапаров.
